Ավելորդ քաշով մարդիկ աշխարհն այլ կերպ են տեսնում. news.am

Ավելորդ քաշով մարդիկ այլ կերպ են ընկալում հեռավորությունները, ինչը նրանց խանգարում է սպորտով զբաղվել:  Նման անսպասելի եզրակացության են հանգել ԱՄՆ-ի Կոլորադոյի Պետական համալսարանի գիտնականները: 

Հետազոտության համաձայն, որքան ավելի է մարդու ավելորդ քաշը,  այնքան հեռավորությունները նրան մեծ են թվում: Իսկ դա խոչընդոտում է վազքով եւ ֆիզիկական ակտիվության այլ տեսակներով զբաղվելուն: Արդյունքում փակ շրջան է առաջանում, որում ավելորդ քաշով մարդիկ ավելի քիչ են զբաղվում սպորտով, իսկ ֆիզիկական ակտիվության ցածր մակարդակը նորանոր անցանկալի ծավալների է հանգեցնում: 

Փորձարկման ընթացքում գիտնականները տարբեր զանգվածով մարդկանց խորհուրդ են տվել գնահատել, թե իրենցից որքան հեռու է ճանապարհային ստանդարտ  կոնը: Իրականում այն 25 մետր հեռավորության վրա էր: Սակայն նիհար կամավորները ենթադրել են, որ այն իրենցից 15 մետր հեռավորության վրա է, իսկ ավելորդ քաշ ունեցողներն այդ հեռավորությունը  30 մետր են գնահատել, այսինքն, հեռավորության ընկալումների միջեւ տարբերությունը երկու անգամ էր:

Բացի այդ, հետազոտողները նաեւ ցույց են տվել, որ ավելորդ քաշով մարդիկ թեքություններն ավելի ուղղաձիգ են ընկալում, քան դրանք իրականում են: Գիտնականների կարծիքով, հեռավորությունների եւ թեքության անկյունների հաշվարկը մարդն իրականացնում է ենթագիտակցորեն, որովհետեւ նրա ուղեղը ջանում է խուսափել ավելորդ քաշի առկայության պարագայում այս կամ այն ծանրաբեռնվածության հետ կապված ավելորդ ջանքերից:

Շատ կարեւոր է այն, որ ինքը` մարդը, տվյալ գործընթացը վերահսկելու գործիքներ չունի: Այսինքն, ճարպակալման զոհերը բոլորովին էլ ալարկոտներ չեն, երբ ձեռնպահ են մնում ֆիզիկական ծանրաբեռնվածություններից: Նրանք ուղղակի աշխարհն այլ կերպ են տեսնում:

Հարցեր, պատասխաններ, մեկնաբանություններ